Orbaya. Fuera orbaya. Soi yo el que fala de ti. (...)

Fotografía tomada de http://chamicu.nirudia.com/slide

IV

Orbaya. Fuera orbaya. Soi yo el que fala de ti.

También orbaya equí dientru. Yes tú el qu'escribe de min.

Nin tú nin yo seríemos pa orbayar: failo un dios.

La poesía ye estraña, vive acullá del orbayu,

non onde los dioses viven sinón enforma más llueñe,

nun llugar secretu de la concencia, de la gramática.

Si nun viviere tan llueñe, coyería un paragües

y diría escontra d'ella. Prestaríame topala,

charrar una terdi entera, acontinar pela nueche,

dando la parola, pitu tres pitu, tiza que tiza,

xugar un pocu al axedrez, amanos albentestate.

Si nun viviere tan llueñe llevaría-y al mio fíu,

un llibru de poesía humana pa comentalu,

o una botella d'agua enllena de tierra vivo.

Pero, llector, ye imposible: diste en qu'orbayaba porque

tú o elli o yo lo dixe y ye dafechu mentira,

hai yá casi una selmana que ta nevao y güei mesmo

la xelada de la nueche torga andar pelos caminos

o escapase mui llueñe a buscar la poesía.

Xosé Antonio García "Pin"

De Los versos del espeyu

Cuartetu de la criación

Colección Teodoro Cuesta

Ayuntamientu de Mieres. 1989